ماضی میں کوئی خوش ہے ۔۔
غزل: نوازش علی خاں
ماضی میں کوئی خوش ہے کوئی حال میں خوش ہے
گدڑی میں کوئی مست، کوئی مال میں خوش ہے
ناخوش ہے کوئی چھلکا ہوا جام بھی لیکر
اک وہ ہے تہی جام جو ہر حال میں خوش ہے
بیگانہ ہے اوروں سے نہ اپنوں سے کوئی کام
ہرشخص خود اپنے ہی مہ و سال میں خوش ہے
بوسے کا کوئی کشتہ، کوئی وصل کا خواہاں
ہاں قیس مگر جلوهِ یک خال میں خوش ہے
فرزانہ اقبال ؔ ہو ، غالبؔ کہ تقی میرؔ
نا خوش ہیں پہ دیوانہ ہر اک حال میں خوش ہے
ناخوش تو مگر ہم بھی نہیں ایسے مگر دل
رُخسار میں ، ابرُو میں ، لب ِلعل میں خوش ہے
دنیا تہہ و بالا ہو ادھر سے یا ادھر ہو
وہ آئینہ دار اپنے ہی اشغال میں خوش ہے
